押後政改諮詢後，不斷話自己好忙嘅「人肉MP3」林D9，上星期「忙」裏偷閒，請公民黨一班大狀食晏。席間袋巾梁家傑力促林D9快啲做嘢，推動唔同黨派傾政改，點知林D9只係不斷重複講過N次嘅官腔，話政府會盡快做嘢，年尾出諮詢文件云云。難怪袋巾都話，如果舉行一個「最令政府安心局長」選舉，林D9一定贏硬，因為佢真係一部人肉MP3，永冇失言，「曾蔭權應該頒個獎畀佢。」
可能林D9講嘢實在太悶，袋巾坦言唔記得食飯時傾過乜嘢，正式一場致暈悶局，袋巾都好慶幸今年獲黨魁恩准，唔使加入林D9經常現身嘅政制及內地事務委員會，避開俾佢悶死嘅機會。