今年預算案劣評如潮，財爺鬍鬚曾正密密做游說工夫向議員拉票，否則隨時創贊成票新低紀錄。民建聯漁農界議員黃容根先旨聲明，今個月22號唔會就表決預算案投票，因為佢21號要入醫院做手術，換右膝菠蘿蓋關節，所以22號一定noshow。
黃容根「保外就醫」
呢個唔係緊急手術，黃容根亦承認界內人士對預算案好有意見，大部份人唔收貨，佢自己睇完份預算案亦「好唔舒服」，要佢投贊成票有難度，家「保外就醫」唔投票一舉兩得。工聯會黃國健亦講到明唔投票，因為佢個仔大學畢業，22號要飛去澳洲觀禮，鬍鬚曾求票佢都幫唔到手，愛莫能助。
保皇黨有人藉故扭計，八方聽聞官府中人都頗為提心吊膽，亦有人指鬍鬚曾一方實際上唔係太擔心贊成票唔夠數呢個問題，因為用錢可以解決嘅問題，根本不是問題，所以民建聯同工聯會先大安旨意行開唔投票。當然，世事多變，投票日發生乜事冇人知，萬一表態投贊成票嘅人忽然甩底，鬍鬚曾唔滴汗就假。