小小一件球衣，足以體現環球經濟變化的最新形勢。著名英超聯球隊曼聯嘅主要贊助商AIG，因陷入財困要政府救命，原本喺06年以5650萬英鎊（約6.3億港元）投得曼聯球衣心口贊助商資格5年，家要中途斬纜。曼聯四出尋找新贊助商，4個潛在競投者全部嚟自亞洲，包括中國嘅研祥智能（8285）。
研祥主席陳志列噚日喺傳媒飯局話，希望藉住曼聯球衣作全球市場推廣，幫公司提高知名度，拓展海外市場咁話。不過競爭對手有來自中東嘅油資，睇嚟要喺曼聯球衣上出現中文都唔易。
研祥係內地著名嘅高端自動化智能（APA）產品製造商，停車場嘅自動閘機同八達通卡自動閘機，都係佢哋嘅服務市場，最大客戶係中國政府。去年下半年總理溫家寶就親臨研祥嘅深圳廠房，請教點樣幫內地企業發展自主品牌同高新科技，陳總就建議畀高新技術人員個人所得稅優惠，跟香港睇齊只收15%（內地最高個人稅率累計可達45%），同加強執法，保護知識產權。唔知溫總收到冇？