唔係大姨媽我鍾意認叻，不過有時見到後生揸車真係亂嚟得過份。坦白講，揸車經驗咁豐富都好，入到去啲旺區都要將車速降慢啲，唔係話時速限制問題，而係有時人真係太多，尤其係油尖旺，不嬲都係交通黑點榜首。根據運輸署定義，所謂交通黑點即係每年有6宗或以上涉及行人傷亡或9宗或以上任何有人傷亡嘅交通意外地點。
彌敦道同窩打老道附近連續幾年都係黑點榜首，政府都喺黑點路段豎個黑點牌話畀大家知要格外小心，唔識字都會見到大大個黑色點喇！早幾日去旺角同女友人食Lunch，勢估唔到行經呢啲黑點時，都仲係見到幾部車飛住去又或者飆住切線咁叻叻嘅，究竟大家當自己係車手，抑或係車神？就算駕駛技術有幾勁都唔該放慢同小心，叫得意外就係意料之外發生嘅事，累到其他人就無謂喇！
文：大姨媽