「《恐怖熱線》，呢位聽眾你好……」記得那些年，又要驚又要聽，越聽心跳越大聲，聽鬼古是集體回憶一部份，不知陪我們度過多少孤寂夜晚，最怕聽到甚麼枕邊凶靈，一聽會不期然望望自己枕頭。很Oldschool吧，Sorry，潮在古老當時興，光天化白講鬼古，路芙與雲海還想協定誰先死，要返回陽間印證世上有鬼。
記者：蒙為亮
攝影：伍慶泉
陳雲海
作家。當過社會福利員及有線電視《怪談》主持，曾勇闖UFO聖地Area51及羅茲威爾，到過70個國家及中國20個省及自治區，2000年開始踏上作家路，有《凶宅魅驚》、《不死劫》、《X檔案之旅》系列等著作。
路芙
電台DJ。經雷宇揚介紹入行，任職唱片公司宣傳人員及有線電視VideoJockey，曾參與《完美情人》、《七月十三之龍婆》、《恐怖熱線之大頭怪嬰》等電影，現主持電台節目《娛樂旗艦店之恐怖日線》、《粵港潮》等。
路芙=路
雲海=雲
記者=記
恐怖熱線之最驚與最Gag
電台節目《恐怖熱線》斷斷續續做了差不多10年，任何人腳變動與時間調遷都不減節目鬼聲鬼氣的風格。今日《恐怖熱線》復活由夜變日，更不讓聽眾Phone-in。莫非主持人一朝俾鬼嚇，十年怕鬼壓呢？
路：梗唔係啦，唔接電話其中一個原因係怕收到投訴，話晒日光日白做節目，聽嗰班聽眾會保守啲。有時雲海唔做嘉賓主持，得番我一腳踢，我會分享個人鬼怪經歷為主，不過真係好懷念以前Phone-in講鬼古嘅日子，又驚又搞笑，哈哈。
雲：有時某啲聽眾打上嚟就話真人真事，點知越聽越唔對路，又如來佛祖又觀音上身。為存厚道，焗住陪聽眾笑，費事拆穿佢，怕佢有Hardfeeling啦。
路：係呀，我哋一去到Off咪播歌個位先狂笑，其實打嚟吹水嘅人好少，Phone-in親嘅都係堅故事，以前晚晚返屋企都份外覺得陰風陣陣。記得有次同潘紹聰一齊做節目，有聽眾打嚟講唔夠兩句就聽有人喺電話：「喂！」起初以為佢夾埋細佬妹玩嘢，點知個聽眾好鎮定，試佢幾次都話自己聽唔到。突然間，個個聽眾都打入嚟話聽到有人：「喂！」
記：兩位有無喺電台見過鬼呢？據聞電台特別惹鬼。
雲：Urbanlegends啫，直播室長期無陽光所以陰氣重、電子儀器容易撞中頻率搭通人鬼線、半夜三更實多遊魂野鬼之類，我自己就無親身見過，都係聽番嚟嘅居多。
路：我無親身撞過鬼，不過我聽過好多電台鬼古，唔方便講啦，你明㗎啦，哈哈……
日光之下 鬼影處處
由細到大，對鬼都有個約定俗成的觀念──鬼只會在半夜三更出現，日光日白鬼影都無隻，因為鬼怕光！事實呢？很多玄學家甚至普通人都有大白天遇鬼經驗，路芙的爸爸，就有一個真人真事的經歷分享。
路：我細個已經信上帝，所以有人問我做乜講鬼唔去傳福音，通常我會話：「你又知我無傳福音？」就算林以諾牧師都會講鬼啦，講鬼同信教根本係兩碼子事。
雲：雖然我已經無信基督教，但我確信世界一定有鬼，因為我唔止一次親眼見過。
路：如果無鬼，耶穌又點會幫俾鬼附身嘅人呢？我嘅信仰認知係，魔鬼為迷惑人，令人對神失去信心，所以根本不足為懼。
記：兩位又覺得日光日白有無鬼？
路：一定有啦，如果唔係使乜做《恐怖日線》！我阿爸未過身前係牧師，佢親口講過見鬼，當年佢喺長洲建道神學院讀書，喺遠處見到灰灰濛濛嘅身影，我阿爸初頭不以為意，仲問：「你好呀，你嚟神學院做乜呀？」之後個灰濛身影就穿過我阿爸身體，阿爸好驚，但牧師話呢個係魔鬼對佢嘅試煉……阿爸呢個經歷，我呢世都記得。
雲：我就真未試過日光日白撞鬼，記得2000年同路芙一齊做《恐怖熱線》，有聽眾Phone-in話自己十幾年前係某天台小學老師，見到有個學生對住佢笑，點知一行埋去個學生就消失，之後同其他老同事講開，先知嗰個學生一個月前喺對面七樓天台墮樓死咗。
路：呢單料我都有少少印象，不過都係嗰句，鬼呢啲嘢，信則有不信則無啦，成日形住形住，反而仲驚。
LA靈異魔術之旅
雲海除講鬼了得，更是個愛雲遊四海的旅遊家，遊山玩水兼搜括旅途鬼古。今年他把舊作《靈異咖啡》重新修訂再推出，書中道盡他的靈異遊歷奇事。難道他天生惹鬼，遠赴至洛杉磯一樣撞鬼。
雲：又唔好講到次次見到鬼，隻鬼都有心嚇我先得㗎，做鬼都無咁得閒啦。
路：咁斷估隻鬼唔會同你拍拖啩，哈哈，咁多《人鬼情未了》咩？哈哈。
雲：係我又想試吓呀！有次去LA想博大霧參觀已故魔術師嘅古堡展覽場MagicCastle，呢個魔術師叫Houdini，但展覽場只招待魔術家協會會員，連馮德倫都無得參加，我不死心，不停請求工作人員格外開恩。
路：一定唔得啦，都講明Membersonly咯。
雲：哈哈，奇就奇在呢度嘞，起初佢好強硬，不過我唔記得講咗句乜嘢，工作人員態度即刻一百八十度轉變。唔止邀請我參觀，仲俾我入去影相兼送張Coupon畀我，話可以隨時帶多兩位朋友參觀兼食埋freedinner。嗰刻我覺得，一定係Houdini上咗工作人員身。
路：係唔係咁邪呀？你誤打誤撞講咗句Code咋？好似芝麻開門一樣？
雲：一定唔係，因為Houdini生前講過，如果自己過身，一定會用任何方法話畀所有人知呢個世界真係有鬼。喂！路芙，不如我哋都Make番個Deal，睇吓邊個死先，再講番畀對方聽……
路：一定唔得，我嘅角度睇，魔鬼出現全為迷惑世人，所以真係Deal唔到啦，我唔想同魔鬼講嘢同做Friend呀。
雲：哈哈！講笑啫……
（註：《娛樂旗艦店之恐怖日線》，逢周一至周五5:00pm-6:00pm在新城知訊台直播）
後記：訪問個多小時，路芙同雲海全程自動波，我耐心細聽，情況如兒時開收音機聽鬼古一樣，依然聽到出汗，或許因為真人真事，又或許他們形容得繪聲繪影，又或許兒時的鬼怪傳聞已根深植入我腦袋。不過時移世易，處身甚麼都愛用科學來解釋的世界，鬼古只會買少見少，有得聽就聽盡點吧。
雲海路芙嚴選八大鬼片（驚嚇度：五粒星滿分）
《猛鬼戲院》：★★★★
路芙：「戲中戲形式殺害觀眾，令入戲院看呢套戲嘅觀眾第一身現場感大增。」
《不速之嚇》：★★★
路芙：「故事力強，妮歌潔曼演得出色，結局個錯模位的確估佢唔到。」
《午夜凶鈴》★★★半
雲海：「用電話鈴聲暗示鬼魂殺機，女鬼喺電視爬出嚟搞到我一度唔敢睇電視。」
《鬼影》★★★★★
路芙：「泰國鬼片登峯造極之作，直接Linkup鬼魂同靈異照片，結局別出心裁。」
《驅魔人》★★★★★
雲海：「昔日作品拍得粗糙反而更恐怖，睇鬼片十居其九都係自己嚇自己啫。」
《咫尺閃靈》★★★
雲海：比《閃靈》更恐怖，一個Shot就嚇爆你，當然要讚米雪飛花破格演技。」
《鬼眼》★★
雲海：「唯一一部我知晒佈局結局，都仲覺得恐怖嘅鬼片。」
《凶兆》（原版）★★★★
雲海：「前幾年翻拍嗰套不知所謂，原版原汁原味，睇十幾次都仲曉驚。」
