求驗客手記:俾法小雞啄死 幼獅森林遇險 - 求驗客

求驗客手記:俾法小雞啄死 幼獅森林遇險 - 求驗客

「哪吒不怕海龍王,幼獅不畏虎和狼!」歌仔唱就咁唱,但現實生活未必係咁;禮拜二嗰場U21友賽,「幼獅」英格蘭U21,就主場俾「小公雞」法國U21啄死,主場淨吞兩蛋。
英格蘭U21已經打入今年6月,喺瑞典舉行嘅歐洲U21錦標賽決賽周,禮拜二就搵決賽周有份嘅法國U21「拍跳」;因為呢場波喺諾定咸森林個主場城市球場踢,英軍領隊皮亞斯喺森林成名,今次返母會,面對江東父老,點都希望好好睇睇贏波,所以排陣都有誠意。雖然有艾邦拉荷升格至大國腳,都仲有占士米拿、侯度史東同文切尼等英超兵;佢哋就算未達星級,起碼都不乏比賽機會,同謝拉特、朗尼等「大佬輩」踢慣。

中堅韋達似紙板

不過,幼獅上仗大勝挪威5粒,今場對住「小公雞」完全唔對辦;尤其效力米杜士堡嘅中堅韋達,好似紙板咁,第一球任由羅連安特前鋒奧巴坦遠射建功。咁都未算衰,輸第二球嗰陣,俾效力圖盧茲嘅中場穆沙施素高由中圈開始「爆贏」,簡直就係食塵,穆沙施素高單刀施射嗰陣,仲招積到挑過曼城門將赫特入空門。
連入場觀戰嘅米堡領隊修夫基都睇到冇晒心機,心諗靠韋達幫手護級,真係九死一生。如果唔係利物浦前鋒尼高治連番失機,英軍上半場點止輸兩球?半場休息時,主場觀眾狂噓幼獅,但下半場都冇起色,最後10分鐘部份觀眾冇眼睇,提早離場。

皮亞斯:寶貴一課

輸得咁肉酸,一向火爆嘅皮亞斯賽後竟然好平靜咁講:「對手發揮比我哋出色,佢哋嘅反擊好有效率,我哋上咗寶貴一課。」我求大俠試圖為為幼獅搵藉口。一來佢哋唔少係英超球隊主力,留力周末英超好過,始終出糧嘅係球會。二來,睇一睇同英格蘭編入決賽周B組嘅兩支熱門西班牙同德國,周二都不約而同和波,係唔係唔想畀真功夫對手睇,留番決賽周先見真章?