公民黨湯家驊噚日喺網誌發表〈鄭重啟示〉，指社民連已正式邀請佢成為該黨永久名譽法律顧問，首要工作係編寫一部權威性同有法律效力嘅《粗口天書》。呢本天書內容包括正確發音提示，希望可以幫助煲呔在內一眾官員，日後正確講、讀、寫粗口。
Ronny又話經詳細考慮後，覺得呢個新使命遠比喺立法會工作意義重大，決定今日正式告別立法會，同時辭去所有政職；由於公民黨一向嚴禁粗口，佢決定辭去黨籍及所有黨務，直至公民黨將粗口列入黨綱為法定語言，先考慮重新加入，佢更祝願香港粗口比普選更早成為官方語言！
相信唔少人都畀呢篇網誌嚇親，睇真啲，其實係Ronny送畀大家嘅愚人節禮物。