自問唔知七、八十年代《新紮師兄》有幾Hit，亦唔清楚九十年代澳門賽車係咪清一色Civic。翻查資料，係！當年車神盲亨於大清水以CivicEK鍊車兼炒車，澳門落場全HondaCivic上陣，難怪一班熟男對Honda如斯追捧，都是因為愛上之後便不能自拔，今日依然固執地要留住猶如初戀的情懷。
記者：梁美甜
攝影：譚盈傑
鳴謝：日本絕版車會
經典傑佬座駕
Honda最為人所熟悉嘅車款，絕對係Civic，第一代Civic首見於1972年，發展至今30多年，經歷八代。Civic車型眾多，有三門及五門揭背款、房車款、房跑車款等，當中以揭背車最受歡迎，呢部鮮橙色一代Civic仔同當年揭背車型一樣以操控性強見稱，前驅車入彎爽快之餘帶少少外甩，帶點瀟灑，難怪當年Hit爆「新紮師兄」梁朝偉，都以第一代Civic做座駕。加上落場車清一色以Civic為主，風頭一時無兩，當日熱戀Honda年少氣盛嘅小伙子，今時今日已經個個成為沉實熟男。
「當年成街都係，不過今日真係唔多……」輝哥都未講完，身旁幾位發燒友即搭嘴：「隨時得番呢部喇！」輝哥含蓄一笑，不無得戚。「上兩手車主花唔少錢同時間去執過成部車，佢哋Keep得好，我唔使點Keep都維持得好好，但部車1.2偈得60匹行高速唔夠力，就連中港大巴都嫌我慢忍唔住狂切線。」馬力又真係細咗些少！
強裝變種版
S2000係本田於1999年推出的一款兩座位軟篷車，性能媲美房車賽用賽車，高度操控更係車款賣點，之不過呢部S2000點解係硬頂呢？
「部車本身係經典單門跑，想部車感覺更加硬朗，咪畫張草圖，改吓個Top、頭冚散熱、沙板……」車主威哥零舍豪氣，軟篷變碳纖硬頂都咪話唔堅，可能係香港獨一無二㖭！耳邊傳來幾位發燒友興高采烈討論聲，最入耳係「全個車殼得扇門係原裝！」仲唔叫強？不過我就有啲疑惑：「咁仲係唔係S2000？」
東洋法拉利
講到Honda嘅經典，一定唔少得N仔（NSX俗稱），本田於90年以人手打造首部全鋁合金中置引擎超級跑車NSX，亦係日本首部身價過百萬嘅跑車，當年新車已搭配280匹VTEC引擎，馬力直逼九十年代拉利328及348，故有日本法拉利之美譽，直路表現絕不遜於現今十代露筍或SubaruSTi。
車主榮仔話新車叫價120萬，超貴，呢部91年行貨車都要28萬。當年歐美都唔相信亞洲人可以造到一部拍得住拉利嘅跑車，而且部車線條真係好靚！問：「可唔可以坐上尾翼影張相？」「邊得呀，料輕唔代表夠硬，個翼似膠會坐凹……」一眾人七嘴八舌．……
兄弟班聚會
點解話幾部車係兄弟班，因為Honda自80年起，就實行一底多用，以高操控性能Civic底盤用於其他車型，好似CR-X、CR-V、Crossroad等等。
基哥×TypeR 輸到轉軚
99年日版TypeR，換過副偈卡鉗同尾喉，再調過副偈令性能更強。「以前揸開Corolla，但就成日輸畀Honda，激氣上嚟就轉揸EG。呢部TypeR斬尾好入彎，反應靈活好玩，不過絕版EF9仲強。」
Kenny×CR-X 愛上佢條尾
Kenny最高峯時收藏四部同款唔同色嘅CR-X，「家得番呢部，記得細個坐巴士見到呢部車個尾咁靚好鍾意，即時記住個名返屋企搵佢嘅資料。我鍾意跑味重嘅車仔！」睇得出！
南哥×Si 追住「電視機」
南哥部87年Si香港無返過貨，唔係Supercar但馬力有成130匹，好勁！「之前就係揸1.5車款，嫌唔夠就叫朋友去日本Bid呢部「電視機」（Si俗稱）1.6返嚟，單係換過四條輪胎，升一級真係勁好多又好玩好多。」
由本田開始……
Honda本田品牌名字由來一啲驚喜都無，點解？唔係Taxi直譯「的士」原理，而係沿用公司創辦人個姓氏。本田宗一郎在1937年於日本濱松成立本田技術研究所，以生產汽車關鍵零件配件活塞環為主，1962年首次投入汽車生產。除了汽車製造，研發出首個模擬人類雙足行路機械人ASIMO及製造飛機，都係車廠嘅兩個重要歷史事件。本田宗一郎本身非常熱愛賽車，更曾在日本國內賽車比賽奪獎，64年本田就以廠隊身份參加F1賽事，更係唯一一個奪得F1賽事冠軍的交通工具製造商。
