陶傑在英文刊物《HKMagazine》撰文，以一貫嬉笑怒罵嘅風格，評論南中國海領土之爭，以幽默筆觸，刺激吓菲傭與菲律賓。記者小Ｂ將陶傑文章傳來畀左丁山睇，當然係典型陶傑，毋須大驚小怪。
但菲律賓人識睇英文（分分鐘叻過香港人㖭，但唔會識得欣賞陶傑），為之大怒，一位菲律賓參議員PiaS.Cayetano（菲律賓參議院社會公義委員會主席）知道之後，大罵陶傑，要求《HKMagazine》與陶傑道歉。唉吔，如陶傑成日講，中文係中國人語言，英文係國際語言，用英文寫政治不正確之事，隨時會引起反彈，假若菲律賓人咬住不放；向特區政府抗議，陶先生就唔覺意累親曾先生，為七一遊行隊伍增加幾千名菲傭！
因此而想起寫英文稿嘅讀者與影響，與中文稿不一樣。有啲大學教授硬係故意不明白，為何用中文寫學術論文難以被大家承認，呢啲教授好多在外國大學取得博士學位，用英文寫博士論文，返到香港，偏偏要話做研究好阻礙佢哋教書，要用中文寫論文，罵他人歧視中文母語。佢哋係詐詐諦諦啫，明明知道用中文寫論文，難以引起國際重視（即使係周小川，佢篇中文文章以第一時間譯成英語在網上發表，先至立即引起美國重視），係都要指責別人歧視，難道係轉移視線，遮掩懶惰？
此外，一流英文學術期刊除語言之外，亦有一個長久傳統，就係刊登一篇論文之前，編輯委員會必定將收到之論文交畀一啲不透露姓名嘅專家評彈，不留情面，前後經三番四次修訂之後，先至可以排隊刊登，程序甚為嚴謹。中文學術期刊唔多見呢樣喎，學術界人士老早知道中國人學術界有學派之見、門閥之見，拉交情，講義氣，屢見不鮮，故此中文學術期刊論文嘅權威性尚未建立。香港算係大中華地區最公平、公正、講究程序嘅地方，香港嘅UGC（大學教育資助委員會）係兩岸三地中最少政治干預嘅撥款機構，一位教授有感而發，話希望香港UGC能夠協調兩岸三地學者出版一批真正嚴謹、公正嘅中文學術期刊，希望假以時日，能具備一流英文學術期刊嘅權威性！