再飲滙源果汁（1886），有機會再嚐到甜頭。
滙源的「第一春」被扼殺，中國商務部下一道禁購令，可口可樂所提出的天價併購，無功而還，滙源股價亦因而大跌，回落到併購前水平。但有消息，滙源的「第二春」好快會出現，出價甚至會比可口可樂更高。
大市回軟，但上升正股有560多隻，滙源係其一，重上5元大關，收5.07元，升0.13元。大跌之日，曾低見3.88元，比最高價10.70元，唔見一大截，但在低位有支持，反覆回升，且每日都有大量成交，看來唔少人對佢仲有憧憬。
據最新同可靠消息透露，解鈴還須繫鈴人，政府會出面收拾「殘局」，為滙源「安排」另一名買家，只要買家係大型國企，又或是具有政府背景，禁購事件就唔會重演，而天價收購亦會水到渠成。
現水平入市，博滙源第二春，有機會賺一個開。可口可樂提出收購滙源的現金價係12.20元，新買家的出價，相信不會相差太遠，第二春若成事實，收購的安全性相信係百分百。
中渝破阻力睇2.35元
滙源在5元水平，向下風險已不大，4元可止蝕，但向上則可大可小，賺幾成到翻一番，機會都有，最宜短炒同中線持有。
內房股氣勢如虹，亦係中資股中光芒耀目的板塊，近期推介嘅中渝置地（1224）、上海置業（1207）同瑞安房地產（272）勢頭都好勁，紛紛創出反彈新高。
中渝派成績表，一如所料，08年（12月年結）見紅，營業額13.9億元，升53.2%，虧損8.37億元，每股蝕38.7仙，但派末期息2仙，07年則有盈利9.05億元。業績見紅主要係集團土地權益於扣除遞延稅項後減值8.85億元。
中渝土儲豐厚，但成本好低，減值相信只係順應潮流之舉，減值後，每股資產淨值仍有4.38元，股價折讓幅度仍大。業績宣佈後，股價曾低見1.68元，果然係低吸機會，噚日一支大陽燭飆升，高收1.93元，已升穿上升三角形阻力，短線量度上升目標為2.35元，中線仍睇一個開。
郭兆誠