教育界議員張文光近日一見到女性就舉……大家咪心邪，佢只係舉手啫。男人最忌不舉，張文更加不能不舉，因為幾日前沙田大圍區補選投票日，佢落區幫黨友梁永雄拉票時被指非禮，見過鬼怕黑，
與女士同舉高手
正所謂瓜田李下，佢話家唔敢隨便同陌生女士企埋，搭時更會舉起雙手以示自己絕非鹹豬手，誓保「貞節牌坊」。張文話近日出街見到熟人都有啲尷尬，雖然老友知佢係老實人，但都忍唔住笑佢千年道行一朝喪，笑到佢面黃，「一係就大笑，一係就陰陰嘴笑。」張文話連高官都幸災樂禍，日前見到多年對手教育局局長孫明揚，孫公乜都冇講，只係笑到攬住個肚，所為何事，張文話有苦自己知。
財爺鬍鬚曾亦差唔多，張文有日喺街上見到鬍鬚曾，對方指住佢笑到咔咔聲，擺明笑佢黑仔兼行衰運。受盡另類目光，張文慨嘆今次真係「出師未捷入差房」。講番當日被指有唔規矩動作風波，張文話至今仍然矇查查，佢話連兩個指控佢非禮嘅女士係點嘅樣都睇唔清楚，今次遭遇係從政以來第一次，「我俾人圍得多，但俾人圍到咁樣，真係廿幾年嚟第一次。」
今次補選由於有人涉嫌賄選大把手尾跟，張文則話相信「非禮事件」已斷尾，佢喺警署落口供足足四個鐘，相信警方都好清楚係乜嘢事；至於警署內有個Madam畀咗個橙佢食，是否暗示同情佢，覺得佢好「慘」，張文話呢層就唔清楚嘞，總之佢清者自清，問心無愧。
譚耀宗亦俾師奶圍
落區助選惹來無妄之災，張文話原來民建聯主席譚耀宗都差啲出事。譚耀宗幫該黨候選人袁貴才站台時，總有一班戴口罩師奶圍實，目的係妨礙佢拉票，好彩冇被人屈鹹豬手，否則水洗唔清，英名盡喪就羞家咯。
陰招拉票之風不可長，咁日後拉票時，使唔使搵多啲女士陪同，或者叫埋老婆一齊出動，減少被屈風險呢？張文話選舉怪招、陰招層出不窮，同全女班一齊拉票，都唔代表可以避免被人屈機，一旦出事，最多都係有多幾個證人幫口，人在做，天在看，做人最緊要行得正、企得正。
mailto:[email protected]