我求大俠最憎人講「家啲後生仔……」，你後生嗰陣咪一樣俾長輩鬧「不知所謂」？！英格蘭國家隊大佬林伯（林柏特），周二就阿伯上身批評新星「名利來得太易」，應該好似自己當年咁，由幫老一輩球員「擦鞋」做起喎！
批評年輕球星不敬業
年僅30歲嘅林伯同記者講：「我越來越覺得佢哋（新人）唔夠敬業，富貴生活嚟得太易、太早，我同泰利都覺得應該恢復學徒球員『擦鞋』制！」佢跟住講起辛酸史，「當年我負責擦迪斯（JulianDicks）嘅球鞋，有時佢就咁飛對靴落我背脊度。」林伯仲舉例話，當年碧咸擦白賴仁笠臣鞋，加斯居尼擦奇雲基瑾鞋喎！
我求大俠以同輩身份（同齡）問吓林仔，既然講到學徒擦鞋咁好，點解加斯居尼最後酗酒、窮困、老婆走佬呢？阿林仔你咁生性，做咩去嫖妓搞到妻（未婚妻）離女散呢？唔通迪斯隻臭腳有毒？其實，取消學徒制係進步嘅表現，韋健遜喺1994年推廣青訓制，係希望學徒踢完波去學校讀書，唔使一世做波牛啫！
林伯矛頭直指朗尼？
咦！林仔扮阿伯鬧後輩，究竟係想批評邊個呢？我求大俠幾經推敲後覺得係朗尼。大家都知朗尼02年16歲時，對阿仙奴入波後身價暴漲，04年加盟曼聯更成為英超高薪一族。之後，朗尼搞最貴嘅婚禮、買最貴嘅車，同老婆高蓮雙雙成為英超風頭躉。最近傳媒就批評朗尼要收斂脾氣，佢老兄一於睬你都儍，囂到飛起！
當然，林伯未必係寸朗尼，我求大俠亦反對佢嘅「擦鞋論」，不過朗尼同英格蘭班新星，好應該珍惜眼前一切。近年英超外援威晒，主要因為呢班外勞搏命要「響朵」；反而班得益於英超泡沫嘅本土新仔，就覺得自己真係世界級新星，場外爛滾、場上扮球星，結果搞到英格蘭成績差囉！
好彩意大利籍領隊卡比路執教後執番紀律，總算似番隊國家隊喇！