社民連三位粗豪議員在立法會連番講粗言，卒之聽在女士耳裏，覺得十分反感，財經事務委員會女主席劉慧卿驅逐陳偉業，女副秘書長甯漢豪以阿媽身份表明反感，令三位男議員無言以對。
黃毓民、陳偉業、梁國雄等究竟講乜，我哋睇電視，聽唔到，聽記者轉述，大概是PK、臭四之類，唔算係粗口，但當然係粗言，不宜登大雅之堂。梁國雄話可以挑戰唐英年，睇邊個識書，左丁山就相信長毛識中文多過唐英年，黃毓民更加識得多，《信報》總主筆練乙錚都引《辭海》為佢哋撐腰啦，此外又有文化左派大聲叫好，推出文化霸權、語言霸權、社會控制等概念嚟支持社民連三子，將在立法會說粗言提升為社會鬥爭，文化戰爭嘅層次。
呢類辯解其實係題外話，引辭書，研究字源更加係掩眼法，以黃毓民之國學根底，佢根本可以引經據典，口若懸河，同樣達到目的，仲可以贏埋掌聲，鞏固票源之餘，爭取埋讀書人嘅支持㖭，使乜講粗言吖；在公眾場合，議會場合，左丁山一定認為不適宜講粗鄙語言，粗口當然係大禁忌，否則議員何以被尊為「尊貴的」（Honorable）或有學問的（Learned）？
左丁山在馬會碰到幾位大學人員，有男有女，女的十分反感，認為甯漢豪得到所有媽咪支持，而據佢所知，好多教協會員對社民連有好大意見，向張文光反映，下次選舉，社民連想取得女選民嘅選票，十分艱難；男的係研究人員，指社民連精於計算，目的在每個直選選區爭取到5%死硬派選民支持，下次選舉爭取五個立法會議席！社民連一定唔會得到主流支持，但只要在每區爭取到重要少數（significantminority）就會達成目標；觀乎好多年青網民支持佢哋三個講粗言，已略知一二。左丁山聽完，隨意打電話畀十位八位男女老幼，發覺所有女士都話唔會投票畀社民連，男士話一半半，年青人就話社民連好好玩，要投它一票，等立法會繼續有人玩嘢，唔使咁悶。咦，大學研究員嘅觀察幾準確噃，特區政府以後如果多搵女高官以甯漢豪口吻反駁社民連，以守為攻，相信會有效力。