今日係愚人節，但講到生死問題，真係唔可以講笑。噚日裕元（551）出咗份通告，話執行董事顧渝生前日喺美國身故。聽講係因急病過身。裕元董事會都有向顧生嘅家屬致以深切哀悼同慰問。顧生享年66歲，97年加入裕元，擔任集團總顧問，負責法律、公司組織、併購、企業社會責任同專案項目，算係裕元董事會內資深成員。佢之前係美國洛杉磯Ku&Fong律師事務所資深合夥人、加州同台灣嘅執業律師，又做過洛杉磯第一儲備銀行執行董事。華華希望佢家人節哀順變。