民主黨上周五慶祝創黨15周年，噚日卻傳來主席何俊仁入院消息！八方嚇一跳，後來查探一番，發現仁哥今次可能係烏龍入院。
據講仁哥上月中同家人去泰國度假，順便去行會成員陳智思家族間康民醫院（BumrungradHospital）做身體檢查。呢間醫院被形容係「曼谷養和」，唔少香港政界人士都慕陳智思之名光顧，好多中產飛曼谷玩幾日，都會入去住一晚bodycheck，幾千蚊有交易。
泰國醫生話要通波仔
仁哥同八方講，泰國醫生指佢心臟血管「好曳」，建議佢即時通波仔，仁哥個頭雖然夠硬淨，但年過五十，自知多少有啲都市人毛病，所以唔係太意外，但決定返香港先通波仔，不過事忙，又想出席埋黨慶，所以安排前日入院。
點知入院再次檢查後，香港醫生卻話仁哥血管情況尚算理想，暫時唔使通波仔可以出院，不過要食藥同注意飲食，仁哥話會聽醫生話，「唔可以再亂食嘢。」