赤柱大樹砸死少女，一條人命暴露政府保育樹木政策千瘡百孔，同被蟲蛀大樹一樣爛到入心。亡羊補牢，煲呔噚日高姿態委任港府第二把交椅唐英年，領導一個跨局跨部門小組，檢討樹木管理，三個月後交報告。
質疑清潔大隊長玩嘢
勞師動眾去處理樹木問題，消息一出，中環即刻陰謀論四起，質疑煲呔又耍手段玩弄疑似下屆特首候選人，表面上委以重任，實際上架空佢，等好兄弟鬍鬚曾更多好位上。明升暗降呢招，其實煲呔都係喺老董身上學返嚟。
想當年沙士期間，全城陷入疫症恐慌，老董乘機叫煲呔領導一個「全城清潔策劃小組」，統領改善環境衞生工作。煲呔當時身為堂堂政務司司長，竟然要撈埋洗後巷、倒垃圾工作，俾人謔稱「清潔大隊長」，真係面紅。
飲香港水、流香港血嘅煲呔能屈能伸，掃街有乜所謂，總之我會做好呢份工，即時摺起衫袖拎起掃把就開工，搵埋好兄弟鬍鬚曾做副隊長，call齊司局長同十幾個署長一齊開會做大龍鳳，承諾三星期內制訂短期工作計劃，三個月內進出一個可持續、包括中長期措施嘅搞衞生時間表。
呢個清潔大隊長做咗乜嘢出嚟，八方相信大家唔知道，事實上亦唔重要，總之佢掃完街，冇耐老董就腳痛下台，佢則輕吹口哨攀上特首寶座。掃街掃到做特首，呢種本事，唔係人人有。
做好樹王變上位籌碼
所以八方認為唐唐千萬唔好因為被老點做「樹王」而灰晒，有賭未為輸，一日未輸清光離枱，都仲有機會一鋪贏凸本利歸來。保育環保係重要議題，樹木管理搞得好，亦可以係博上位政治籌碼，呢一點，八方相信唐唐好清楚。
治大國如烹小鮮，要管好香港，得把口空喊國際金融中心、亞洲國際都會、乜港物港呢啲高大空口號已證明不可行，既然香港樹木管理制度一團糟，若然唐唐有能力將全港有危險吊吊Fing樹木整頓妥當，難道不是福為民開豐功偉績？種瓜得瓜，種豆得豆，邊個話種好棵樹唔可以做特首！
mailto:[email protected]