由旺旺、中天電視老闆蔡衍明入股亞視開始，大家都估到亞視會同台灣中天電視台有密切聯繫，亞視早前宣佈重組數碼廣播頻道，引入台灣中天電視，並設定第14台為中天亞洲台。大家可以喺數碼頻道免費收睇到中天台節目，包括小S徐熙娣同蔡康永主持嘅《康熙來了》同《超級星光大道》等香港人都鍾意嘅節目。
劉綽琪險變植物人
中天亞洲台今日啟播，噚日亞視喺大埔總台舉行啟播儀式，亞視執行主席張永霖、行政總裁胡競英同中天高層都有出席，台灣靚女吳佩慈就做啟播嘉賓。現場播放中港台藝人祝賀中天亞洲台啟播嘅片段，好似有舒淇、黃曉明、徐熙媛、鄭元暢以及同無綫有約嘅楊千嬅同陳奕迅。
吳佩慈話老友小S嘅《康熙來了》好睇，但成日俾佢爆私隱，佢話：「都唔慣，但佢個人就係咁，我未試過同佢因為咁鬧交，但會傳短訊畀佢。」劉綽琪原來早排入咗醫院，佢話：「舊年喺內地做完嘢返香港，一直都感冒未清，到二月突然哮喘發作，仲昏迷入院，入咗ICU（深切治療部）三日，其間要插尿袋，又要打嗎啡，醫生話我遲兩個鐘入醫院就會變成植物人。」