早兩日細姪揸車嚟接我去飲茶，咁有心就算坐嘅唔係歐洲車都無所謂啦！殊不知無幾耐部車居然爆胎，細姪即時話自己換，我就理所當然蹺埋手坐喺車等，點知搞咗陣竟然話無後備胎咁叻叻！
坦白講，大姨媽我開始揸車嗰陣部部新車都一定有個後備輪胎喺尾箱，仲有千斤頂同工具箱㖭！時移世易，除咗我揸開嘅歐洲車同房跑車之外，好多新車為減輕車身重量以節能，出廠時就已經無咗後備胎，但一般都會配有一支所謂補胎劑，好似用噴劑咁，按個掣就會噴出補胎劑自動修補車胎受損部份咁叻叻㗎！其實打個電話叫人幫手都好容易，但係細姪話晒都係男人，呢啲小事都係留番畀佢自己處理，反正大姨媽又唔使返工，大把時間同佢Hea，畀個機會細姪學吓處理問題仲好喇！