良禽擇木而棲，撈政治想快上位，就要識得泊個大碼頭，民建聯貴為「執政聯盟」成員，推薦畀政府做副局長、政治助理或其他公職嘅人特別吃香，所以近年入黨者爭崩頭。不過入到黨都唔係一條直路扶搖直上，仲要過幾關先有資格排隊等上位。
民建聯培養第二梯隊嘅副發言人制度快將進行新一屆遴選，八方聽聞內部競爭好激烈，10幾個位竟然有50個人角逐，民記去蕪存菁，先篩走30人，再學電視真人show《飛黃騰達》咁，要剩低嘅20人玩淘汰賽。
星期日（4月5日）會舉行一個演講會，由10個評判畀分，表現好有得留低，否則就即out。大家唔好以為門檻好高，其實係唔使講英文嘅。