經濟差，好多人擔心自己會加入失業大軍，所以慳得就慳，不過，如果拿揑不準，反而會得不償失。
試想如果為享特價餐，等到下午茶時段才食晏，甚至唔食早、午餐，諗住一餐頂兩餐，分分鐘會捱壞身體，最終導致健康出現問題，到時要花的醫療費用，分分鐘貴過你食少咗嗰兩餐。
有人以為傷風感冒好小事，到藥房買成藥自己搞掂，以為慳番醫藥費，但拖拖吓最大可能係令病情惡化，最終醫療費反而更多。其實，現時大部份僱主都有為員工提供醫療保險，打工仔應善用員工福利，病向淺中醫。
慳埋唔夠蝕
此外，有時貪小便宜的心理，亦會令你因小失大，好似百貨公司送你一張100元的現金券，但就要消費滿500元才可使用，這100元的優惠，可能會令你覺得賺咗、好抵，但其實只是催谷你消費，額外多花400元，買埋一屋唔等使的東西。其實，節儉絕對不是一件壞事，但要衡量得失。