百年一遇嘅金融海嘯，令成個投資銀行業前景變得黯淡，唔少i-Banker做到冇癮索性劈炮唔撈。華華八到，深獲股神畢菲特賞識嘅高盛銀行家特洛特（ByronTrott），最近亦決定自立門戶開商人銀行，仲得到股神入股支持。
特洛特一向深受股神器重，話佢有投資眼光，所以近年畀咗唔少生意佢做。以舊年為例，巴郡掟幾十億美金買高盛同通用電氣（GE）嘅優先股，同埋收購箭牌糖果（Wrigley）3單「大刁」，都係由特洛特穿針引線，儼如股神嘅御用經紀。
事實上，股神喺舊年嘅致股東信中，力讚特洛特係少數以客戶為先嘅i-Banker，幾年前亦話佢比任何一個接觸過嘅賓架更了解巴郡，難怪幫股神寫《雪球：畢菲特自傳》嘅作者AliceSchroeder都認為，特洛特係股神嘅最佳接班人啦。