噚日，有個基金朋友打電話畀華華話：「金融海嘯奇蹟呀！」華華聽到都有啲愕然，即刻問個究竟。
華華認識嘅呢位基金朋友，喺一隻專炒輪嘅對冲基金度做，佢哋投資前會做好多功課，但居然包括埋輪商人事變動，原因係有啲人出價會比較進取，所以一有人跳槽，一定要跟到實。
基金朋友話，牛熊證做到本港第一嘅某歐資投行，最近有成隊人突然辭職，傳聞話俾同鄉挖走。華華問：「咁嗰間歐資投行走剩嘅『輪人』驚唔驚唔掂？」
保證花紅出手重
基金朋友話：「剩低嘅人就唔驚，因為佢哋一路都冗員多，家做得嘢嗰班冇走，走嗰啲只係擦鞋最強。要驚反而係撬人嗰間行，公司突然請成隊人過檔，現有團隊一定出現大屠殺。不過呢班被挖角嘅人，擦鞋一定好勁，因為傳聞話佢哋用埋guaranteed花紅去挖。」
華華：「仲有guaranteed花紅？金融海嘯完囉！」