投資銀行係今次金融海嘯重災區，幾乎每日都聽到投行嘅壞消息。瑞士傳媒Sonntag引述知情人士話，瑞銀集團將會再撇賬最少20億美元非流動資產，包括貸款抵押債券（collateralisedloanobligations）；同時，瑞銀會再度裁減8000名員工。
華華翻查年報，瑞銀08年底全球有7.9萬名員工，咁即係裁員約一成。據講有關方面聽日（4月1日）正式公佈，但報道就冇講細節。瑞銀方面亦未有回應。
之前已裁員7000
其實，自07年中開始，瑞銀撇賬已經超過490億美元，累積裁減超過7000個職位，其中大部份嚟自投資銀行部門。今個月11日，瑞銀已經發出警告，話公司仍然受資金不流動及市場波動影響，短期前景「非常審慎」。究竟有幾審慎？應該好快會揭盅。