立法會最近為咗邊啲係粗口浪費咗好多時間，其實使乜煩，搵廣管局幫手就得，邊啲說話係粗口，邊啲說話教壞細路，廣管局係專家。煲呔1月喺特首答問大會上爆出「狗噏」，當時無綫直播，結果有3個觀眾投訴煲呔用語粗俗，教壞細路。廣管局噚日開會，認為特首只係講咗「類似聲音的言辭」，一般觀眾唔會認為唔可以播出街，對兒童唔會有不良影響，裁定投訴理據不足，變相幫煲呔平反。
指投訴阿嬌理據不足
煲呔可以狗噏，其他人就切勿亂噏，商台《在晴朗的一天出發》節目主持黃永喺1月22日節目中，用「賤格、下賤、無恥、下三流」等字眼狂鬧女新聞官，唔只驚動港府高層，仲引嚟124個聽眾投訴，廣管局裁定黃永點名鬧人係人身攻擊，違反電台《業務守則》，決定只對商台發出勸喻，算好留手。黃永噚日透過商台公關表示，尊重廣管局決定。
無綫上月初喺《志雲飯局》、《東張西望》同新聞報道等節目播出天真嬌嘅復出造勢訪問，結果有679個市民投訴指訪問教壞細路仔。不過廣管局噚日認為成個訪問並冇任何內容唔適合兒童收睇，裁定投訴通通理據不足。連廣管局都撐佢，天真嬌嘅眼淚總算冇白流。