思捷環球（330）近排人事變動立立亂，戈達（ThomasJohannesGrote）辭任執行董事搞到股價急挫。話唔走又走、但又冇講清楚幾時走嘅主席兼行政總裁高漢思，噚日出嚟為戈達辭職解畫兼講埋自己嘅去留。
思捷股價噚朝仲跌緊10.8%，集團中午就高漢思去留嘅傳聞發出通告，指截至噚日，董事會都冇收過佢辭任行政總裁嘅通知喎。
唔夠三粒鐘，收市後高漢思喺投資者電話會議度又承認，會唔做行政總裁，但繼續做主席，確保一切運作正常，仲話思捷會最遲聽日公佈行政總裁嘅繼任人選。
辭CEO留任主席
千呼萬喚始出來嘅高漢思，喺電話會議上透露咗啲繼任人嘅端倪，話佢家喺一間生意額約莫156億銀嘅企業做緊，喺零售上好有經驗，佢一入到嚟唔會即刻做行政總裁個位，高主席話會慢慢咁放權畀呢位繼承人，如果一切順利，佢老人家就會喺2010年唔做行政總裁喎。
高主席仲首次承認，戈達嘅離去，係同冇得做行政總裁有關，又話從來冇講過戈達係當然繼任人㖭，而佢哋兩人之間亦冇其他嘢。喺思捷由31歲做到45歲嘅戈達，原本係行政總裁大熱門，但一個屈尾十俾個外來人騎住，真係唔走就假嘞！
澄清後股價跌少咗
噚日思捷張通告雖然好似冇講到啲乜，但就係呢張通告，令思捷股價跌幅下晝收窄至6個巴仙收市，喺大跌市都算係咁啦！喺呢啲亂世，華華突然好懷念前主席邢李㷧㖭。
李華華
mailto:[email protected]