毛孟靜喺上年立法會選舉中輸個馬鼻，痛定思痛重新出發，近日將公民黨九西支部，由油麻地搬到紅磡黃埔，呢次執位唔係搬竇咁簡單，而係牽涉到搵番自己定位問題。
毛孟靜承認，今次支部搬遷，除咗想搵個闊落啲嘅單位外，仲有戰略因素，因為紅磡黃埔屬中產區，公民黨應該集中火力發掘中產票源，不過佢強調唔代表放棄基層。佢認為公民黨最大賣點係理性、專業、講道理，同埋「唔講粗口」嘅形象，佢話最近落區做地區工作時，遇到一個靚女，大讚佢係「中產代表」，有知音人當面讚賞，令佢好開心，佢透露或會考慮出選區議會。區議員都係議員，如果可以由低做起，都好過無。