香港幼稚園學生及小學一年班學生人數，不斷降低，故此引起「殺校」問題，啲學校雖然歷史悠久，亦不能倖免，最近有報導話，九龍塘一間新式學校，創校不久，因教書方式未必受家長認同，已經收生不足，要為縮班而煩惱，校長提前離職㖭，可見今時今日，辦學着實不易，最深層嘅理由，就係本港出生率低低低。
呢日收到記者B電話，要求左丁山幫忙，協助佢大哥嘅孫進入銅鑼灣一間幼兒院，入得到就可以升上幼稚園嘞。左丁山為之愕然，反問之：「周街都係幼兒園、幼稚園，點解偏偏要入銅鑼灣嗰間，仲要託人事？我唔識T老闆嘅噃！」記者B話：「T老闆間學校出名吖嘛，人人都想送仔女入去㗎，讀完幼兒園就可以讀幼稚園，跟住入著名小學、著名中學，考入大學有把握。俗語話一年之計在於春，一生之計在於入到邊間幼兒園呀！」
唉吔，原來做人阿爺甚艱難，仔女結婚要安排（例如代付供樓首期），到抱孫嘞，又要幫孫兒孫女搵學校（因仔女未有社會關係託人事），左丁山幾為過咗六十歲嘅阿爺感到辛苦。記者B講嗰間學校，名氣甚大，據講教英文好，教得嚴咁話，左丁山冇一手經驗，不敢置評，但以經驗嚟講，並不贊成自細就猛咁催谷啲細路，人生係長途賽，使乜出閘就即刻打鞭吖，跑二千四百米噃，最緊要留前鬥後，入到直路還有餘力衝刺，左丁山有份隻馬曾出賽千四米，頭段搶放，段速去到二十一秒六，成班校友見到就話要撕飛咯，我哋隻馬唔係「精英大師」級數，點會有力放到尾吖。隻馬果然入到直路就散晒，任人魚肉，幾乎包尾返嚟。
賽馬如是，做人亦如此，左丁山見到好多細路讀幼稚園就猛咁讀，入到著名小學，但上到中學就考試包尾咯。因此勸記者B：「勸吓你阿哥送個孫入以玩樂為主嘅幼兒園、幼稚園啦，做細路哥最緊要玩得開心，唔好令佢見到本書就想喊！」肥仔K讀幼稚園時，手空空返學，手空空放學，書本功課一概留在學校，而且只係學識二十六個英文字母，apple，boy，cat，dog……啫，現在點呀，總之叫做讀完書啦，識得三文四語啦，奉勸各位，送子女╲孫入到「教之嚴」嘅名牌幼稚園，未必係一生成功保證。