真係唔到你唔服，公仔箱又有秋官新劇出街，一直係股海夢魘的所謂「秋官效應」又再靈驗，港股於期指結算日大散。以往雖然好多人都話「秋官效應」無根據，但好多次都同大跌市撞到正，唔通鋪鋪咁巧合？
全國連鎖火鍋店小肥羊（968），最近獲得在美國上市、並擁有快餐店肯德基及必勝客等品牌的百勝餐飲入股近兩成股權，成為第二大股東，每股作價2.40元。呢單消息曾刺激小肥羊股價炒上3.22元高位，之後出現整固，昨收報2.86元，微跌0.02元。
短炒目標3.50元
百勝點解吼小肥羊？恕星俠真係唔知，速食店一味講快，打邊爐就係一種慢慢烚的飲食文化，完全不同風格。今次入股，似乎係百勝想加快進軍中國市場；另外，小肥羊亦可學到人家成功管理經驗，有助未來滲透內地二線城市。今次單「刁」可謂各有所求。鑑於市況波動，入市採低吸策略，短炒目標睇3.50元。
方星俠