今日交更吹水時段，行家竟然唔講波講馬，而係講起的士裝鏡頭話題，個個七嘴八舌吹得起勁，不過唔係圍繞道德同實用性上，而係互相交流「車後震」心得。一時話遇過忽得妹全程自High，一時又話有怨婦借意挑逗，總之乜都有，越講越有味。老實講，呢類火辣場面我都遇唔少，最離譜一次喺灣仔酒吧街，接一對西人過東涌，有長途客我梗開心喇，點知上車唔夠一分鐘已傳來刺耳「啜啜」聲，我梗係望住倒後鏡當睇戲咁睇。過完隧道，雙洋已等唔切，即場砌起上嚟！雖然動作好慢，但我已嚇到面青口唇白，踩大油門嗱嗱聲送佢哋返歸。
港九新界的士司機總會申請車內裝鏡頭，原意係保障行家，攝錄片段亦只有監察機構先攞到嚟睇，起碼以後無人敢搭霸王車，又或有女人亂嗌非禮。本來我都好贊成，不過衰婆阿鳳講得好啱，換轉係你，搭車時幾個Cam向住你，又點會坐得自在？咪盞搞到更少人搭的士。仲有呀，裝咗四個鏡頭嘅的士，只影到車前馬路同後座，前座乘客位係盲點，若遇到白花油王子，一樣走唔甩咋喎！
文：黃師傅