轆Book：Golf爆住推　一杆18區

Golf身為近年彎路之王，次次試車都係點到即止，始終唔多夠喉。見近排細車復興，索性同代理借架GTI幾日，港九新界走勻晒，DSG波箱真係值得信賴，由鬧市塞車、多彎山路到公路高飛，一支波棍推爆18區，叻過老虎仔一杆入洞喇。

記者：徐影龍
攝影：黃子偉
Model：Algie@PureModels

三利器　攻彎有信心

揸足四日，日日唔同目的地，行駛超過200公里，對GolfGTI同DSG波箱，可算有更深入嘅了解同體會。第一日由將軍澳出發，穿過西貢、北潭涌，再直入馬鞍山回程，路段特色係彎多又窄，軟硬適中嘅GTI懸掛可算係首個功臣，原廠Setting已經最好，幾個狹窄急彎，扭入時都相當得心應手，只要個Brake收得好啲，基本上高速入彎都好Firm。第二功臣係DSG波箱，搭埋雙Clutch系統，波段隨住轉數一齊升，一個D波已做到上落波都咁靈活，對以EngingBrake收油入彎效果相當顯著。第三功臣係2.0TFSI引擎，直四搭Turbo，並非得鋪蠻力直飆，280Nm引擎扭力峯值喺1,800rpm時爆發，到彎心時有效抵抗G-Force作用力，再拉直車身出彎，講解上可能好複雜，簡單一句形容，就係極之咬彎，D波都唔會輕易「波Out」。我有個怕死同事，起初坐我側邊唔多開聲，劈完幾段山路後，開始鬆毛鬆翼講吓爛Gag，證明對架車嘅穩定性信心大增。
有利必有弊，DSG轉波快，對劈車人士嚟講梗係好喇，但我玩鬧市道路時，速度普普通通，每次停燈位時，波段都落得幾急，造成架車戳咗幾下，想靠個Brake好Smooth好斯文地收車，可能要時間適應一下。

■三幅式軚環都幾粗，手握感實在，但大長途兼多彎會幾攰。

■一個D波夠玩全香港，手痕時先轉玩+/-波。

■前排兩個位都係電動調校，腌尖公主都無投訴。

揸四日　腰骨無詐型

除咗性能表現，長期測試最能感受車櫳設備嘅貼心程度。首先覺得軚盤太粗太重，劈急彎時雖可減低又輕又幼嘅飄忽危機，但換轉大長途遊車河時，隻手都幾攰。另外FSI結構為高壓噴注，撻車後引擎會迅速運作，務求令副偈快點Warm-up，所以響聲較大，大到有啲車主會以為引擎有事，其實行順咗好快就靜番。
對司機及乘客而言，車櫳設備已算照顧周到，前排兩張電椅，畀你舒舒服服校高低角度，揸足幾日都唔覺腰同頸會攰同痛，叻過唔少同級同價車種。中控台使用亦算直覺式，冷氣、音響、電窗、電鏡、死火燈等一摸到位，唔會出現騎呢佈局搵餐懵。不滿嘅有兩點，第一係散銀格擺得太後，仲有蓋冚住，好難攞啫！第二彈係居然無杯架！
總括而言，個人認為GolfGTI六成狠辣、四成斯文，若你需求正係呢個比例而唔係相反嘅話，GoAhead！反正車價已減到30萬有找，絕對物有所值。