創校18年嘅科大，噚日宣佈第三任校長由陳繁昌教授出任，首任校長吳家瑋都有出席陳教授同師生對話大會，會後佢大讚陳繁昌，但對現任校長朱經武卻唔多客氣，言詞間更句句有骨，好唔畀面。
吳家瑋話其實喺佢做校長時，已想禮聘陳繁昌到科大做系主任或院長，家終於成事好高興，希望陳繁昌可以為科大重振雄風，言下之意，似乎暗示科大喺朱經武領導之下一蹶不振。八方印象中科大過去幾年發展唔錯，籌款數字亦不下於港大、中大，吳家瑋有咩咁睇唔順眼呢？
吳家瑋暗踩朱經武
可惜吳家瑋冇講明陳繁昌應該如何補身重振雄風，係咪要將重振雄風列為校訓，由新校長帶頭，規定教授、學生朝念晚背呢？科大至今未有校訓，因為校董會早兩年認為仲有其他要事待辦，所以不急於制訂校訓，陳繁昌上任後，唔知會唔會再考慮呢個問題。
吳家瑋噚日又指陳繁昌願意放棄研究專心做校長，真係犧牲好大。朱經武雖然係科大校長，但仍保留美國研究工作，不時返回美國做實驗，而卸任校長後亦會返回美國繼續研究，吳家瑋明讚陳繁昌，其實暗踩朱經武不務正業，真正笑騎騎，放毒蛇。
可能係創校校長，對科大感情特別深厚，吳家瑋家仍以市值租金租住科大宿舍，不時喺校內出入。
點解吳家瑋對朱經武咁有意見呢？科大中人指，原因之一係吳家瑋真係認為朱經武港、美兩邊飛，唔能夠專心處理科大工作；另一個原因，則同前教育局局長李國章幾年前鼓吹中大同科大合併有關，朱經武對此建議頗為熱心，有科大教授話，吳家瑋認為朱經武有「出賣」科大之嫌，一旦兩大合併，等於白費十幾廿年前倡議設立第三間大學心血，因此對朱經武亦冇乜好感。
至於另一個比較八卦嘅講法，則牽涉到科大校長府個泳池，當年吳家瑋被指浪費公帑掘個私家泳池自己享用，朱經武入主後即將個泳池填平，有教授話可能有人俾呢個「填氹」動作激親，覺得俾人挖苦，道氣未落，耿耿於懷至今。