跨媒體才子陶傑大名衝出香港躍上國際新聞舞台，佢喺《HKMagazine》文章指菲律賓冇資格宣稱對南沙群島有主權，因為好多菲傭喺香港打工，做工人嘅唔應該「侵占」老闆國家領土，呢篇「遊戲文章」引起菲律賓勞工團體不滿，本地菲人組織UnitedFilipinosinHongKong噚日都發出聲明批評陶傑。
聲明指陶傑文章擺明嘲笑菲傭，侮辱菲傭人權同尊嚴，而且冇品味同貶低菲傭人格，更可能令菲傭受到更多不人道待遇同更嚴重嘅種族、階級歧視，令人質疑佢有冇濫用到新聞工作者嘅權利，咁樣蔑視外傭十分荒謬，要求陶傑同《HKMagazine》公開道歉。
陶傑噚晚表示，英文博大精深，唔同文化嘅人可能有不同理解，佢絕冇嘲笑外傭之意，只係諷刺財大氣粗刻薄外傭嘅無良僱主，如果有人誤解而感到受傷害，佢深表歉意。