我讀小學已經睇《鐵拳浪子》，中學就睇《潮與虎》、《ARMS》，之後《第一神拳》、《惡魔人》。玩呢隻Game我無諗佢個系統好唔好、連招勁唔勁，見到矢吹丈同一步嘅夢幻拳擊之戰，已經起雞皮！你細個睇過邊幾套漫畫？一齊揸住部PSP將搭車嘅時間燃燒貽盡，變成雪白的灰吧！
文：大条承太郎
新舊人物隻揪隻
《SundayVSMagazine集結！頂上大決戰》中嘅Sunday，即係《周刊少年Sunday》，Magazine即係《周刊少年Magazine》。呢隻Game係紀念呢兩本漫畫周刊創刊50年、由Konami開發嘅。包含兩書內超過30套作品，除上段提過嘅，仲有《犬夜叉》、《史上最強弟子兼一》、《植木之法則》、《再造人009》、《閃靈二人組》等等，漫畫人物Crossover隻揪隻，經典必殺技一一重現眼前。而有啲人物，好似《鐵拳浪子》嘅平叔、《惡魔人》嘅飛鳥了，則係打緊時㩒L加「□」掣叫出嚟幫拖嘅輔助角色。小朋友梗係玩得開心，有番咁上下動漫年資嘅，更加感受到一份男人嘅浪漫，你睇，矢吹丈有招必殺技係坐喺張凳度，仲有SpotLight射住，嘩！我又起雞皮喇！
三個模式儲人儲必殺技
睇漫畫點會唔識打機吖？如果你真係咁特別，都唔怕！簡單操作都可以懷念你的快樂時代，因為呢隻Game可以選簡單操控模式，好容易就出到華麗必殺技。
遊戲模式方面，則可以揀單人模式係咁打，打爆就有新角色用；或者冒險模式完成不同任務，呢個模式仲可以最多4人線連齊齊合作；最後就係對戰模式，而不同模式中都可以儲到育成點，而呢啲點數就係俾你育成角色，開發更多隱藏必殺技，呢方面大大提高遊戲嘅耐玩性。
Profile
遊戲平台：PSP
遊戲類型：動作
製作廠商：Konami
遊戲人數：1-4人
查詢：i-Gamer（27253338）