因醉酒駕駛而久唔久導致他人傷亡，令特區警察大為緊張，嚴拿酒客駕駛。本來飲酒有上限指標嘅，吹波仔超標，好應該罰，例如停牌、扣分、罰款、坐監之類，加重罰則一定冇錯。但香港警方比較特別，飲酒標準並冇提高，但成日恐嚇話要突擊截查，凡飲過酒嘅，不論飲多少，都可能碰上麻煩。好顯然，警方係用威嚇、擾民嘅方法嚟嚇阻飲酒駕駛，不論是否醉酒駕駛。
如此一來，好人一個，自然唔想無端端畀警察捉到「飲酒駕駛」（有別於醉酒駕駛）。出外吃飯，唯有滴酒不沾。大記者前一輪到九龍灣「大榮華」吃晚飯，肥佬韜揸住樽紅酒，猛勸人飲，但在座各位男士不為所動，話要揸車返屋企喎，肥佬韜為之冇符。現在老友之間，時興吃晚飯不飲酒，或講明邊一位負責揸車，其他人先至飲，個個如是，餐酒銷量唔受影響至奇，又或者好似財務Ａ咁，家住港島，逢有晚飯局，放工就揸車返屋企先，再坐的士赴會，港島地區細小，對佢嚟講，出入坐的士唔會太貴，但吃飯，特別係西餐，唔飲紅酒勢係假。但係咁，老友約佢去九龍或者新界（西貢吃海鮮或沙田馬會），佢就一定推得就推。
飲一杯紅酒，照計好多人都唔會醉，如今搞到一滴都唔敢飲，香港警察實在太霸道。左丁山素來只在飯局飲一至兩杯，從未醉過，勝在晚晚坐的士出入，唔怕畀警察捉到，以自己酒量之淺，飲兩杯尚且不醉，唔怪得好多「海量」之人覺得好委屈。
連帶所及，一位馬會董事在馬場請客，當然有紅酒白酒啦，但每到下午三點鐘（第五場賽事），董事就會吩咐侍應不再斟酒，等客人有兩至三個鐘頭時間消除酒氣，如此細心為客人着想，難得之至，當然不少人有司機接送嘅，則可以由頭飲到尾。
餐飲Ｍ賣開歐洲葡萄酒，對警方嘅滋擾性做法，不以為然，佢認為香港人好守法，不能以個別例子為理由嚟懲罰所有人。餐飲Ｍ又講到宣傳口號「切勿醉酒駕駛」，十分清楚，但英文口號「Ifyoudrink,don'tdrive」，就似乎好論盡，而且冇醉酒駕駛之義，律師Ｗ話美國嘅宣傳口號係「Donotdrinkanddrive」，亦無醉酒駕駛嘅意思。左丁山想起在泰國見過「Drinkdon'tdrive」，美國佬餐廳羅話：「我鍾意呢句，好易明白，文法通唔通，唔使理會啦，最好改為Drunkdon'tdrive!」