香港才子話多唔多，話少亦唔算少，但數曝光率最高嘅，非陶傑莫屬。大家唔只喺報刊見到陶才子舞文弄墨，喺電台、電視聽到佢議論東西，甚至喺旺角行行吓街，都會望到佢（幅巨型海報）喺度sell燕窩。最近，佢仲因為一篇大作，衝出香港，喺菲律賓響朵。
訓誨菲傭南沙屬中國
陶才子上星期五喺《HKMagazine》嘅專欄，寫咗篇題為"TheWarAtHome"嘅文章。本雜誌主要以居港洋人為對象，呢篇文亦自然用英文寫成，洋名ChipTsao嘅陶才子喺文中藉南沙群島主權爭議發揮，話菲律賓唔應該同中國爭呢幾個礁島，因為有成13萬菲律賓人喺香港做廉價勞工；作為「傭僕之國」，菲律賓冇理由同自己嘅主人對抗，同米飯班主拗手瓜。
早前菲律賓宣稱南沙群島係該國領土，仲有國會議員提案不惜出動海軍一戰；自言愛國嘅陶才子話聞訊後只覺熱血沸騰，即時喺屋企掛起張地圖，嚴厲地訓誨咗佢嗰位擁有馬尼拉大學國際政治學位嘅菲傭Louisa一番，仲警告佢，如果出年仲想加人工，星期日去皇后像廣場同班姊妹相聚時，就最好向所有同胞申明，南沙群島係中國領土。
陶才子話，佢已經同Louisa講明，如果中菲爆發大戰，就會炒咗佢，否則自己隨時觸犯叛國罪，因為出糧畀幫佢洗馬桶抹窗、每日做足16個鐘嘅Louisa，Louisa轉頭又會交稅畀菲律賓政府，咁陶才子咪變相真金白銀資助敵國海軍侵犯祖國？
陶才子話，佢有啲朋友仲激，已經喺屋企宣佈緊急狀態，每次喊「南沙群島」，佢哋嘅菲傭就要即刻大聲答"China,Madam/Sir."
要求列不受歡迎僱主
陶才子嘅文風向來嬉笑怒罵，但明顯菲律賓方面就唔係好欣賞佢「陶式幽默」。德新社噚日報道，呢篇文章已經辣㷫咗馬尼拉一個協助菲傭嘅組織，個組織已經要求菲律賓勞工部門，將陶傑列入不受歡迎菲傭僱主黑名單。當地有位左翼國會議員仲大鬧陶才子篇文可惡卑劣，係二流之作。
八方問陶才子點睇呢單「外交風波」，佢就話只要識英文嘅人，都睇得出篇文係怪論風格，文中訓斥菲傭等情節亦係杜撰，佢同自己個菲傭嘅關係不知幾和諧，仲話菲律賓反應過敏。
mailto:[email protected]