一到國際賽期，好多大會領隊都頭痛，事關陣中球星如雲，大大話話十幾二十個主力被國家隊徵召，打完返嚟攰到死都算，搞到又傷又病更慘。不過阿仙奴領隊雲格今次就好特別，「恩准」前鋒艾迪巴約出戰世界盃外圍賽，上周六呢位多哥國腳更加一箭定江山，以1:0打低由伊度奧領軍嘅「非洲雄獅」喀麥隆。
打低當「弗」伊度奧
艾迪巴約自從2月8號代表阿仙奴出戰熱刺拉傷大腿後，已經有成6星期冇正式比賽，佢嘅受傷更加令到兵工廠有一陣子入球荒。今次艾迪巴約入選多哥世盃外大軍，原本對上陣都有懷疑態度，好彩賽前得到雲格大開綠燈，艾迪巴約話：「我同我老闆（雲格）商量過，佢都讚成我出戰，今次全國都好期待我。」雲格亦好大方咁講：「佢出賽對佢同球會都係好事。」
艾迪巴約不愧為應屆非洲足球先生，休戰個幾月，復出首仗只花11分鐘已經搵到首個入球。雖然之後佢射失12碼，不過無損球隊贏波，喺世盃外非洲區A組旗開得勝。喀麥隆球星如雲，好似有當「弗」嘅伊度奧、韋保、謝列美等壓陣，但就要落筆打三更，第一場分組賽就輸波。
兵工廠眾將輪住翻生
雲格一向都數口精，非洲區今輪只打一場外圍賽，相信艾迪巴約周中就可以歸隊報到；有一場外圍賽做熱身，足夠提升狀態喺周六主場對曼城嘅英超比賽復出，而且上周六其他外圍賽中，阿仙奴前鋒表現都唔錯，好似尹佩斯幫荷蘭射入第2球，主場3:0大勝蘇格蘭。俄羅斯2:0輕取阿塞拜疆，艾沙維冇波入，但都算有好表現。以呢排阿仙奴3連勝兼攻入9球氣勢，艾迪巴約及時谷起狀態，法比加斯亦即將復出，對之後爭歐聯4強同英足盃決賽資格，都好有幫助㗎。