金融海嘯令唔少靠大機構、大企業捐獻嘅慈善機構，冇咗大水喉。好似香港人熟悉嘅公益金，善款10年嚟首次出現赤字。其實唔少慈善機構會靠投資收益幫補，咁最好就係搵專業人士幫手。
不過，據專為慈善機構管理投資嘅蘇格蘭皇家顧資銀行（RBSCoutts）香港業務主管鍾金剛講，調查顯示只得四成受訪嘅慈善機構，會由專業人士理財，雖然個調查得30間機構參與，但佢哋相信，為慈善機構管理投資喺香港應該有得搞，所以年初開始主力喺本港發展業務。
最緊要唔好蝕
華華以為，幫慈善機構理財，唔蝕就得，點知鍾金剛話每個慈善機構要求、性質都唔同，好似資助學生去留學嘅獎學金，因為要用外幣發放獎學金，所以投資組合持有外幣嘅比例會較大，相反，本港獎學金就用港幣支付，所以投資組合要度身訂做。佢話無論邊類慈善機構，投資策略都係保守為前提，始終人哋捐錢畀你，唔可以蝕咗佢嘛！