自去年金融海嘯席捲全球，股壇波幅上落大，鄭少秋當年主演劇集《大時代》丁蟹一角，該劇播映期間出現冧巿，自此咁啱每逢秋官有劇出街，股巿必受挫，坊間認定呢個係「丁蟹效應」。無綫上周五播咗《學警狙擊》大結局，同時段今晚會播出秋官同周麗淇主演嘅《桌球天王》，股民近日好擔心巿況會再受衝擊。
秋官買股票穩陣
為向股民派定心丸，呢次喺劇中係扮演桌球精英嘅秋官，前日已經喺無綫官方網度話：「如果真係咁準，我應該發咗達好耐啦！我自己都有買（股票），放心啦，QSir（鄭少秋喺劇中暱稱）唔會一Q清晒大家個袋。」秋官近日喺內地拍劇，佢噚日喺電話度再補充：「如果大家相信丁蟹效應就要趁低吸納，但買時買，都要睇清楚個價位。」有投資嘅秋官自問係穩陣派：「我一直只係買滙控（005），我都決定供股。」
欣宜寫信畀肥姐
謝天華扮嘅Laughing哥為《學》劇掀高潮搶收視，不過由於Laughing哥結局翻生無厘頭，觀眾喺facebook發起杯葛緊接嘅《桌》劇，秋官話一啲都唔擔心：「我哋呢套劇內容都好豐富，觀眾真係一定要留意。」
另外，秋官乖女鄭欣宜噚日去灣仔出席天堂家書及思畫比賽，並擔任「策動天使」同評審委員，其間有位婆婆送上對聯鼓勵欣宜勇敢面對。欣宜話：「媽咪離世時我傷心咗好耐，一直收埋自己，後來先至釋放自己。」欣宜話雖然肥姐已離開，不過佢家都有寫信同埋寫記事帖畀媽咪，覺得係一個好好嘅治療方法，同肥姐分享一切。
