上個禮拜，見報率最高嘅財經新聞，非滙控供股權（2997）正式上市莫屬喇！聽日就係最後交易日，想沽要趁手。不過，滙控（005）喺好多香港人心目中，地位依然穩固，好似華華認識嘅一位滙控老股東陳伯咁，揸咗滙控股票超過半個世紀，絕對稱得上係滙控超級粉絲。
1954年低撈滙控
陳伯不但冇諗過沽咗啲滙控供股權，上個禮拜仲專程去到灣仔合和中心，滙控嘅股票過戶處度搞供股手續。佢話：「我1954年買滙控。」
冇錯，係1954年，當年港交所（388）都未成立，華華翻查《香港金融業百年》，再問埋滙控公關大員，先知有百幾年歷史嘅滙控，早喺1891年香港經紀協會成立本港首個證券交易市場時，就同時喺呢個交易場掛牌上市。
陳伯話第一次買滙控時十幾蚊，咁半個世紀之前嘅滙控係咪十幾蚊股，連滙控公關大員都冇資料。
不過，1950年港股因為朝鮮戰爭陷入低潮，嗰年成交額只有6011萬銀，係1948年嘅38%，直到53年停火股市先暢旺番。照咁睇，陳伯當年可以話係低撈。
陳伯話：「一直以股代息，慢慢儲到家約3萬股滙控，股價上到130蚊都冇諗過賣，今次會全部供股，第日留畀仔女。」
李華華
mailto:[email protected]