民建聯即將舉行中委改選，佢哋嘅黨員呢排開始收到候選名冊，入面有齊55個候選人嘅政綱簡介同資料，等佢哋喺4月1至15日期間揀出心水馬。雖然55個候選人爭50個議席，競爭唔算好激烈，但民建聯中人唔係咁諗，因為今次選舉，有成十個元老級人馬退選中委，目的都係想啲新仔上場，但據聞有老將仲未玩夠，堅持競選連任，搞到黨內中委餅仔唔夠分。
各有馬房
八方聽聞，好多參選新丁都幾擔心，事關黨內中委選舉名單雖然係以筆畫排名，但有分新、舊人，呢18位新丁只可以排尾，而好多黨員投票時以為係黨內推薦名單，慣咗一剔就剔頭50位。身為佢哋大佬嘅民建聯巨頭都有啲擔心，據聞正積極為徒弟拉吓票，好似副主席劉江華撐劉國勳、曾鈺成捧鄭泳舜、今屆退下火線嘅葉國謙自然希望姪仔葉傲冬接棒、黎榮浩就有秘書長簡志豪射住。
無論班新仔可唔可以突圍，最矚目一定係預料勝出中委後獲選副主席嘅溫嘉旋。溫律師拒評係咪上位在望，只話等選完中委至算。