晉身行會做煲呔智囊、代表香港向車公求籤，真係光宗耀祖嘅事，鄉議局聯同27個鄉事委員會，噚日喺元朗大球場擺千六圍盆菜，請兩萬人到場齊齊慶祝發叔做行會成員，為新界人爭光。
八方噚日都有去現場，確係十分壯觀，全新界村落都有鄉里捧場；咁都唔止，多位局長、副局長同政治助理都有亮相，發叔真係夠晒「飛士」。發叔位極人臣名留青史，有心人仲想將佢威水史寫落健力士世界紀錄大全，希望創造最多人食盆菜紀錄，因此特別請咗理工大學派員見證兼做統計員，幫忙點算人數，點知鄉里三扒兩撥就將盆菜掃光隨即鬆人，統計人員未趕及數人頭，場內已冇咗大半人，可能要改為創最快食完盆菜世界紀錄。