參加服務獎頒獎禮，遇到議員Ｌ，劈頭就問佢有冇十點共識，佢話未有所聞，佢在北京之時，參加政協經濟組座談，所以唔知道甚麼中聯辦與特區政府的十點共識，左丁山笑佢：「你位舊老友占美話有噃？」議員Ｌ話：「此乃羅生門，越講越亂，一個話有，一個話冇，你叫我信邊個？」左丁山本來都係懷疑派，但獨家報導此項消息嘅係《文匯報》噃，如果係其他報紙，可以當係小說家之言，但愛國報紙對中台港之政治新聞，家規甚嚴，不得半點糊塗，《文匯報》對呢啲事情，好少講錯嘅啫，唔通偏偏就係錯呢一次？
議員Ｌ話：「講呢啲事做乜吖，不如搵埋你一齊刨馬，輕鬆吓好過！」又係噃，議員Ｌ有獨門秘方，點都唔肯講畀左丁山聽其中邏輯或推理根據，只係成日話有靈感，「覺得」嗰日旺乜嘢顏色。記得有一次在董事廂房遇到佢，當時人頭湧湧，不便詳細講貼士，議員Ｌ只係講一句：「以下幾場睇住紫色綠色嚟買。」咦，連續四場都有紫色綵衣（即騎師件衫嘅顏色）跑入前三名，令左丁山吃了一驚，追住佢問點解知道紫色當旺，議員Ｌ一味話靈感忽至，難以解釋。佢既然話到要一齊刨馬，一於應承喇，睇吓可唔可以偷師學睇顏色吖嘛。
講出嚟，啲專業評馬人一定媽媽聲，話有辱專業。左丁山冇呢個意思呀，不可誤會。專業如王登平，方駿暉，吳志林，佢哋嘅貼士經常中到七彩，唔到你唔服，但呢個世界上講親賭博，就一定邪邪哋，不可完全不信，否則如何解釋（好以係二月份）有幾次賽馬，成日跑出十號馬，搞到心水清馬迷追冧巴呢！左丁山鍾意乜都聽，不會完全排斥某一派嘅賽馬「理論」，總之無論白貓黑貓，捉到頭馬嘅貼士就係好貓。
與議員Ｌ拜拜後翌日，睇《大公報》呢份嚴肅報紙有一段新聞，別家所無，極有趣味性，就係劍橋大學公開達爾文在劍橋讀書時期之流水帳，顯示達爾文在劍橋三年間，唔計學費用咗四萬六千鎊，屬頂級奢華學生，斥資請傭人洗衣擦鞋清潔多過買書錢。呢段新聞好好睇，但內有敗筆，就係《大公報》寫到明，達爾文今年二百歲冥誕，但又寫達爾文在一九二八年一月二十六日入劍橋，一九二八年？《大公報》喎，嚇死！