天安（028）過去半年喺最近3年低位橫行，郁都未郁過，內房股熱炒，轉吼天安。由上年10月到家陣，已經有唔少內房股熱炒，龍頭好似中國海外（688）翻咗一番。富力地產（2777）仲巴閉，5個月累積升幅3倍，天安同期係冇郁過，落後到極點。
天安最新NAV6.53元，現價（2.03元）折讓69%，內房股有咁嘅折讓，好吸引。天安家陣喺祖國嘅土儲，樓面高達6625萬平方呎。呢期金融海嘯，講增值似乎嘥氣，但祖國有能力最快恢復增長，加埋天安咁龐大土儲，中線增值潛力，唔係嘢少。簡單計數，天安土儲每方呎係咁意增值100蚊，已經可以為集團帶嚟66億銀增值，係集團市值1倍。
再講，天安手頭現金近25億銀，淨現金5.8億銀，銀彈充裕，進可攻、退可守。呢轉博天安翻半番到3.05元，相對重估前NAV，仲有53%折讓。
中亞炒資源股概念
中亞能源（850）對上星期五過60球股數成交，交投先行，好。中亞前身永成國際，改名轉型石油企業。喺2月時分，集團又話繼續同兩間歐洲上市公司，洽商石油及天然氣區塊勘探及開採權，似乎真係想發大嚟搞。又先排除呢個協商，中亞最新NAV0.66元，現價（0.211元）折讓上到68%。呢期市場另一個熱炒焦點係資源股，中亞有唔錯NAV墊底，兼有炒資源股概念。嚟轉短打，博升20%到0.25元，中亞折讓仲講緊高達62%。
錢雋