肥龍許仕仁卸任政務司司長後逍遙自在，甚少公開露面，跑馬日子卻例外。噚日佢名下嘅「真財實料」喺香港第二次出賽，肥龍同老婆齊齊入場打氣，果然順利贏馬，仲請埋身兼馬會董事嘅老友葉澍堃同多位老友一齊拉頭馬，不知幾咁happy。呢場頭馬獎金有成35萬元，肥龍話但凡名下馬出賽，佢都會買例飛，今次亦然，「真財實料」以5.4倍獨贏開齋，肥龍笑晒口話收穫唔錯。
「真財實料」跑出，同日肥龍同唐唐夾份養嘅「大師」卻三甲不入，肥龍話唐英年身有要事，所以入唔到場，佢又話「大師」淪落到第五班佢都唔想，只望隻馬生生性性，盡快贏馬，等佢哋拉番場頭馬喎！唐唐近日受到粗口風波困擾，可能真係要拉頭馬冲喜吓。
劉遵義少入場
噚日第八場二班1,200米草地係中大校友會盃，「魄力之城」奪標，由行會新貴、好少入馬場嘅中大校長劉遵義頒獎。03年起每個馬季都有一場賽事冠名為中大校友會盃，同歷史悠久嘅港大校友會挑戰盃分庭抗禮。