金融海嘯搞到泰國曼谷冇晒歐美豪客，好多五星級酒店都推出超平套餐救亡。小妹早輪同朋友去relax吓，點知俾人偷咗嗰部手提電話，仲有一大堆手尾跟，從中吸收咗唔少血的教訓，最肉痛係碌卡打長途電話返香港報失，就用咗$700。
小妹點樣打咗一生人最貴嘅長途電話。話說小妹發現電話不翼而飛後，諗住盡快打電話返香港「停台」，以免被賊人用嚟「喪打」長途電話。小妹唔想麻煩朋友，就自己四圍搵電話打，行行吓留意到好多間7仔外邊都有收費電話，上面仲有大大個牌，寫有多國語言，教人點用信用卡打長途電話，諗住冇死錯人喇。
應在7仔買電話卡
於是按指示刷卡打電話，途中斷咗一次線，要第二次刷卡打過，最後終於成功「停台」，全程少於10分鐘。返到香港冇耐，小妹收到信用卡月結單，打開一睇，有兩項長途電話公司賬目，加埋成$700！肉痛到爆嘅小妹打電話問「泰國通」胡慧沖點解咁貴，點知沖哥話：「我都未試過咁戇居咁樣打返香港喎！」沖哥話，要又平又安全打返香港，其實可以喺7仔入面買電話卡，都係百幾蚊。小妹總結教訓，除咗冇管好財物抵死之外，冇了解收費就碌卡亦係大忌。
電郵：mailto:[email protected]