特首、高官、議員輪流爆粗，香港由轉口港變成粗口港，勁過上海，可歌可泣。煲呔日前出招還擊社民連後，八方聽聞，政府高層暫時唔會再出手，睇吓泛民有乜動靜再作打算。
不過停火嘅安樂日子唔會太長，因為星期三立法會就會連續兩日辯論預算案，官場中人估計社民連會再生事，其中一個咬住唔放嘅目標係政務司司長唐唐，八方知道政府內部曾經討論，假如長毛等人當日又玩嘢，官員會視乎情況執行唔同應變方案。
辯論預算案各出奇謀
具體有乜嘢plan，知情人士唔肯露口風，總之唔會繼續罵不還口，例如社民連大鬧「仆街」，官員會即時要求主席裁決係咪冒犯性語言，若然主席裁決認為有冒犯性，對方又肯收回，咁就繼續開會；假如言出不收，社民連寧願被趕走，官員亦唔會糾纏。
萬一有人爆完粗賴死唔走，繼續狂鬧，甚至出手掃枱，又如何應付呢？據知政府已就唔同情況進行沙盤推演，最惡劣情況係場面完全失控，無法開會，咁就唔使諗，最高層落咗order，一眾官員會起身拉隊離場，官員話評估過，相信主流民意會撐政府！
民意角力遊戲有排玩，社民連堅持爆粗有理，長毛噚日表明社民連會維護批判政府嘅話語權，又指假如立法會輕易就官員投訴而限制議員發言，可能令議員失去監察政府權力，因為官員可以用議員言論有冒犯性做擋箭牌，拒絕回應質詢，變相癱瘓立法會。
長毛：好多中產爆粗
長毛又指官員不知反省，唐唐講吊吊Fing係正宗粗口，點解高官可以講，議員不能做？至於煲呔講完狗噏唔認更係公然講大話，話冇聽過狗噏，先係真正狗噏。好多市民聲討議員爆粗，長毛話大家唔好咁偽善啦，好多中產講粗口都十分流利，「唔信你走去中環啲酒吧睇吓啦，我都唔明點解要將仆街變成十惡不赦語言。」
落吧吹水講粗口係一回事，喺議事堂又唔係咁講法，社民連應該知道分別，事實上自己友亦有微言，有信教黨員坦言唔認同爆粗。其他泛民不欲受牽連，唔敢輕舉妄動，總之一切按立法會主席裁決行事。
mailto:[email protected]