第一次同隔籬嘅青蛙仔合作寫〈救生圈〉，佢喺呢個專欄不時扑中冷嘢，好在我畢傑都唔差，就等我哋兩個整條冷門過關互串吓，話唔埋係今期中大獎。
我打算今次全部玩晒世盃外賽事。重點推介，揀第7組塞爾維亞作客羅馬尼亞不敗，開埋3.35倍冷W都仲得！羅馬尼亞喺小組表現好差，1勝1和1負僅僅好過魚腩法羅群島，佢哋好在打少一場，今場贏唔到塞爾維亞嘅話，出線好大問題。不過睇番嗰3場波，羅軍只係贏過法羅群島，仲主場輸過畀立陶宛0:3㖭！梅度、馬利卡呢啲主力當然有入選，衰在守將捷禾因傷缺陣嗰度弊嘛！小組榜首塞爾維亞話晒有尼曼查維迪、施積同史坦高域等勁人，趁主隊勢頹，唔贏等幾時？波膽要7.5倍嘅0:1啦！
愛爾蘭保加利亞吼和
第8組方面，坊間一聽到保加利亞冇咗曼聯射手貝碧托夫，足智彩即開愛爾蘭主場[-1]，有冇咁狼死？我知愛爾蘭呢場波好齊腳，喺小組得3勝1和，但擊敗過嘅都係塞浦路斯同兩次贏格魯吉亞咋喎。保加利亞都有柏杜夫同蘭治洛夫等好手撐場，我話有得踢，要個3.05倍D，賽和1:1啱晒數。
另外點少得〈早飛2+5〉推介過嘅英甲波，要彼德堡主場贏李斯特城，不過為咗有更好分頭，我揀5.5倍「和/主」，事關呢類榜首戰通常半場會踢得謹慎，波膽兼顧10倍嘅2:0。
文：畢傑