八方噚日報道有位好慷慨男士林敦勇，立遺囑將500幾萬元身家捐畀大角嘴鮮魚行學校，咁有心真係令人嘖嘖稱奇，不過有某政黨核心人士睇到報道，卻不禁失笑。
據呢位政黨人士透露，呢位林先生早前亦曾主動接觸該黨，表示願意捐出總值400幾萬元嘅遺產。幾百萬元唔係小數目，有人捐款當然喜出望外，但慎重起見，佢哋亦做足功夫，查證林先生並非篤手指，證實佢確係有幾百萬元身家。
不過詳談後卻發覺唔妥，林先生話係因為擔心家人謀財害命而捐錢，講到家人放毒氣、落毒藥害佢，情節離奇過小說，但該黨不欲拒人於千里，最終都安排一名黨高層見證立遺囑儀式，所以該黨都持有一張林先生嘅遺囑。
政黨唔驚爭產
如果呢位林先生真係立咗超過一張遺囑，日後佢百年歸老，鮮魚行學校咪可能要好似龔家咁，隨時要同其他人打爭產官司？上述政黨人士笑言，好在佢哋個黨有唔少法律界人士，指遺囑如果喺神志不清情況下訂立係冇效嘅，所以佢哋從來冇諗過分到遺產。