亞洲高清協會新任主席李柏權（Alan），啱啱接咗莊想大展拳腳，點知遇到金融海嘯，早輪就有間老牌樓上AV影音店執笠。Alan話，最近個巿好靜，即使係呢排AV界最熱嘅iDTV都賣少咗，投影機銷路仲少咗成半。喺咁嘅環境推動高清影音係有一定難度。今年協會重點話題都係俗稱機頂盒嘅數碼擴播解碼器，計劃會開班免費教導業界同巿民真正認識吓機頂盒。
發展高清音樂
Alan話，雖然機頂盒滲透率家有30%，但好多人對機頂盒仲係一知半解，即使係連鎖電器店售貨員，只係識賣機，客人想問得深入啲即刻Ｏ嘴，「我有次巡過啲電器連鎖店，有個客想買部機頂盒，問店員駁唔駁到部舊電視。點知個sales講到哦哦，又得又唔得，個客梗係冇買啦。又有次見個客退返部機畀店員，話部機睇唔到有線。」
佢又話，另一個議題係高清音樂。因為高清畫質嘅發展空間不大，家係時候發展高清唱片。家聽歌CD仲係主流，但呢種格式近30年歷史，音質有一定限制。最近開始出現高清音樂，從音訊源入手，喺母帶攫取最靚音樂訊號，失真更少，頻率更闊，「呢啲高清音樂細緻度遠高過一般CD。」
Alan話，呢啲高清音樂可以載喺blu-ray藍光碟，或者經過電腦下載儲喺記憶卡，喺美國好興，「但係你話高清唱片可唔可以取代CD，仲係言之過早。」