滙控截止供股踏入倒數階段，香港滙控散戶眾多，近排無論去老麥定返到公司，總會聽到有人討論供定唔供呢個話題。小股民心如鹿撞，有人想問多啲意見，竟然連管理強積金供款嘅基金信託公司都唔放過，打電話去呢啲基金公司，表面上查詢自己份強積金縮咗幾多水，實際上借頭借路探聽呢啲所謂大戶口風，睇吓供唔供得過。
基金公司精甩尾，當然唔會隨便透露投資決定，八方噚日見到積金局高層，循例都問吓積金局對滙控供股有乜睇法，有關人士背熟對白，指基金經理要以打工仔利益作依歸做決定。即係答咗等於冇答，真係打工仔利益至上，應該唔好再供強積金，即時回水就真。